ERAP:
ANG ORIG NA MR. SUAVE
Ni Tess Clarin
Artista,
producer and later on politician. Maraming
papel ang ginampanan ni Jose Marcelo Ejercito,
popularly known in the movies as Joseph
Estrada. Napakahaba ang landas na tinahak
niya at bawat matuntungan ay pawang tagumpay
ang napitas niya. But very applicable
kay Joseph Estrada ang kasabihan na ang
buhay ay parang gulong, minsang nasa itaas
at minsang nasa ibaba.
Mula sa pagiging
college dropout ng Mapua Institute of
Technology ay pinasok ni Joseph Estrada
ang daigdig ng pelikula. Kandelerong
Pilak ang una niyang movie noong
taong 1954 na pinagbidahan ni Lilia Dizon,
ang naging asawa ni Gil De Leon at nanay
ni Christopher De Leon. Hindi agad siya
napansin ng publiko pero sapat na yun
para magkaroon ng lakas ng loob si Joseph
na ituloy ang career sa movies. Noong
taong 1957 ay lumutang ang kakaibang character
niya sa pelikulang Sampung Libong
Pisong Pag-ibig na pinangunahan
ni Charito Solis, Eddie Rodriguez, Oscar
Keese at Luisa Montessa. Napansin nga
siya ng mga moviegoers kaya lang ay Jose
Ejercito ang ginamit niyang screen name.
Ayon sa kuwento ng ilang
nakakaalam, nagalit daw ang magulang ni
Joseph sa paggamit niya ng Ejercito sa
movies. Being a prominent family, gusto
nilang manatiling disente at respetado
ang kanilang apelyido. Noong mga panahong
iyun ay tila black sheep ang turing kay
Joseph ng kanyang pamilya. Ironically,
Estrada ang napili niyang screen name
na ang ibig sabihin ay kalye o road. Naging
masuwerte naman ang pangalang Joseph Estrada
dahil yun ang nagbadya ng sunod-sunod
na tagumpay ng nasabing black sheep.
Si Joseph Estrada ang matatawag
na original na Mr. Suave. Sa local movies
ay laan lang sa mga kontrabida ang bigote
gaya ni Eddie Garcia, Rod Navarro at Paquito
Diaz pero sinuway ni Joseph ang trend.
Siya ang nagpauso sa bidang may bigote
na sinundan naman ni Jess Lapid at Jun
Aristorenas.
Taong 1958 nang pumutok
sa takilya ang Lo Waist Gang.
Ito ang kuwento ng mga kabataang magkakabarkada
na nagpakitang ubra namang silang maging
mabubuting tao. Kasama ni Joseph Estrada
sa billing sina Fernando Poe, Jr., Zaldy
Zschornack, Herminio Bautista, Bobby Gonzales,
Berting Labra, Boy Sta. Romana. Ang Lo
Waist Gang ang unang directorial
job ni Pablo Santiago.
With
FPJ’s photo at the background, Erap
poses with his true friends
Kasabayan ng pagsikat ni
FPJ ay nagsunod-sunod na ang movies ni
Joseph Estrada. Naging best friend niya
si FPJ at ilan pang kasama sa Lo
Waist Gang. Si FPJ mismo ang
nagbansag sa kanya ng pet name na Erap.
May mga kuwentong nagsasabi na ang barkadahan
nina Erap ang sumupil sa tinaguriang Big
Four, isang grupo na nambibiktima ng mga
artista sa pamamagitan ng black mail.
Bilang pagbibigay-pugay
sa lugar ng kanyang kapanganakan, ginawa
ni Erap ang Asiong Salonga
noong 1961 at ang Tondo Boy
nang sumunod na taon. Ang nasabing movie
ang nagpatunog sa pangalan ng mga siga
sa Tondo gaya ni Asiong, Ben Ulo at Adiong
Sikat.
Ang rurok ng tagumpay ay
narating ni Erap noong taong 1962 sa pamamagitan
ng Markang Rehas. Ito
ang napiling Best Picture ng FAMAS. Ang
FAMAS (Filipino Academy of Movie Arts
and Sciences) ang tanging award-giving
body noong panahong iyun. Ang Markang
Rehas ang unang pelikulang nakapanalo
ng kapuwa Best Actor (para kay Joseph
Estrada) at Best Actress (para kay Perla
Bautista). Sa tingin ng mga tao ay perfect
pair si Joseph at si Perla. Maugong ang
balita noon na si Perla Bautista ang unang
babaeng gustong pakasalan ni Joseph Estrada
kaya lang ay tinanggihan si Perla ng ina
ni Joseph dahil ayaw ni Doña Mary
na maging manugang ang isang artista.
Sapantaha tuloy ng ilan na yun ang dahilan
kung bakit naging pilyo sa babae si Erap.
Taong 1964 nang magwagi
bilang Best Picture ng FAMAS ang Geron
Busabos, kuwento ng mga taong
palengke na sinasabing sa San Juan Market
ang setting. Si Erap din ang hinirang
na Best Actor at si Boy Alvarez ang nagwaging
Best Child Actor. Ang leading lady ni
Erap ay si Imelda Ilanan na nominated
naman sa Best Actress category. Si Arsenio
Doña ang nakasungkit ng trophy
for Best Cinematography. Ang Best Screenplay
at Best Story award ay napunta kay Augusto
Buenaventura. Iyun ang simula ng successful
partnership ni Erap bilang artista at
Buenaventura bilang director.
Makalipas ang dalawang taon
ay muling umani ng tropeo sa FAMAS si
Erap. Tinanghal na Best Picture ang Ito
Ang Pilipino. Bukod sa pagiging
Best Actor ni Erap ay napili ring Best
Supporting Actor si Eddie Garcia at Best
Cinematograper naman si Felipe Sacdalan.
Si Barbara Perez ang leading lady ni Erap
sa Ito Ang Pilipino.
In the footsteps of Lo
Waist Gang ay ginawa ni Erap
ang Cuadro De Jack. Kasama
niya rito ang kapuwa action stars na sina
Jun Aristorenas, Jess Lapid at Jing Abalos.
Ang leading ladies nila ay sina Imelda
Ilanan at Sofia Moran. May nagsasabing
si Imelda Ilanan ang paboritong leading
lady ni Erap dahil suwerte raw si Imelda
sa mga movies na ginawa ni Erap.
Joseph
Estrada and Susan Roces at his Tanay residence
Bilang unang hall of famer
ng FAMAS sa Best Actor category, pabirong
pinatutsadahan ni Erap ang best friend
niyang si Fernando Poe, Jr. ng “Una-una
lang yan.” Sumagot naman si FPJ
nang “Pinagbigyan lang kita, Erap.”
Ang 5 movies na nagbigay ng Best Actor
award kay Erap ay ang Markang
Rehas (1962), Geron Busabos
(1964), Ito Ang Pilipino (1966),
Patria Adorada (1969)
at Kumander Alibasbas (1981).
Bukod sa pagiging magaling
na artista ay magaling na producer din
si Joseph Estrada. Bilang pagbibigay galang
sa mga magulang ay itinayo ni Erap ang
EMAR Pictures na halaw sa pangalan ng
kanyang mga magulang na si Emilio at Maria.
Naging FAMAS hall of famer ang kanyang
Emar Pictures sa mga pelikulang: Geron
Busabos (1964), Ito Ang
Pilipino (1966), Kill
The Pushers (1972), Bakya
Mo, Neneng (1977) at Kumander
Alibasbas (1981).
Taong 1973 nang gawin niya
ang Erap Is My Guy together
with Nora Aunor. Kapuwa nasa kanilang
kasikatan kaya hindi mabilang ang kinita
ng movie nila. Nang matapos ang pelikula
ay lumabas ang balitang na-in love si
Nora Aunor kay Erap. At may balita rin
na pinatulan daw ni Erap si Nora Aunor.
Ang Sa Kuko Ng Agila
noong 1989 ang last movie ni Erap bago
siya tuluyang inagaw ng pulitika. Leading
lady niya si Nikki Coseteng at kasama
rin ang panganay niyang anak na si Jinggoy
Estrada at ang kumpare niyang si Paquito
Diaz. Kapuwa senador si Erap at si Nikki
noong ipalabas ang movie nilang Sa
Kuko Ng Agila. Noong panahong
yun ay tinatanggihan ng senado ang mga
American bases at ang movie ay patungkol
sa tunay na kalayaan ng Pilipinas.
Very successful ang movie
career ni Joseph Estrada, ang original
na Mr. Suave ng local movies. Bukod sa
mga awards at kinita sa takilya ng kanyang
mga movies ay hindi maikakaila ang adoration
na ibinigay sa kanya ng publiko. Totoong
nakapanghihinayang nang tuluyan niyang
talikuran ang movies kapalit ng kanyang
career sa pulitika.
*
photos courtesy of Boots Plata
Para
sa mga reaksyon, maaari kayong mag-email
sa tessclarin@yahoo.com.
