PAMANANG KWENTO NINA LOLA AT LOLO
Ni Julie Ann G. Nuñez


"Maning naman! Mauupo ka lang naman, ano bang masama roon?" sabi ni Lola sa tumataas na tinig. "Aba eh kung ganon…ikaw na lang. Mauupo lang naman pala.". tinig ni Lolo na medyo asar na rin. Medyo naguluhan ako sa pag-uusap nilang iyon bukod pa sa nangangawit na ako sa position ko. Eh kung pabalabag na isasara ni Lolo ang pintuan ay tiyak na lagas ang tenga ko. Kung bakit ba naman kasi nakinig pa ako ng usapan ng may usapan.

Dahil hindi ako nakatiis na malaman kung ano ba ang pinagdidiskusyunan nila, eh kumatok na ako. At saka ko biniro sila na "Naks naman Lo…La ano ba yang mauupo?" sabay kindat sa dalawa.

Sukat ba naman doon ay humagalpak ng tawa ang Lolo ko. "Apo naman, kung anu-ano na naman iyang nasa isip mo." At doon ko lang nalaman na si Lola ay nagyayayang manood ng Till I Met You. Nak's naman si Lola gusto pang kiligin. Ayaw kasi ni Lolo manood dahil ang corny raw ng mga palabas ngayon.

Sa isip-isip ko eh di mas lalo na ang movies ng kapanahunan nila. Marahil ay nadala si Lolo nang minsang makapanood sila ng walang katorya-toryang palabas. "Nak ng yhuwi naman eh… hindi nila gayahin noong panahon namin. Lahat ng palabas may sense. Ke gagaling pa umarte nila Rogelio, Carmen, Pepito at Rosemarie…Ke gagaling na artista talaga." Dahil doon medyo na-curious ako.

At dito na nagsimulang magkwento sina Lolo at Lola. "If my mind serves me right noong 1950's ang hottest tandem ay sina Rogelio dela Rosa & Carmen Rosales na isang singer sa radio. Halos lahat ng movie nila ay may mga kanta. At naging trademark nila ang kantang Maalaala Mo Kaya. Ang una nilang movie ay ang Arimunding-munding. " parang bumata yata si Lola ng ilang panahon sa pagbabalik-tanaw sa nakaraan.

"At noong late 1960 ay sina Susan Roces & Eddie Gutierrez. Andyan rin sina Pepito Rodriguez & Rosemarie Sonora noong 1970." Napukaw ang interes ko dahil dito. Ano ba ang muwang ko sa mga sikat na artista noon. Ang kilala ko lang ay ang sa henerasyon natin ngayon.

ROGELIO & CARMEN

Sino ba ang mag-aakala na si Rogelio dela Rosa ay lumaban sa presidential election noong 1961 vs. Carlos P. Garcia & Diosdado Macapagal. Sure win na siya dahil suportado siya ng Manila Times, ang pinakamabiling newspaper noong panahong iyon. Pero nagulat ang lahat ng bigla na lang siyang umatras sa laban. I smell something fishy huh…Di kaya… hmmm ano nga kaya? Bahala na nga kayo mag-isip.

Sabi ni Lolo hindi naman daw nalaos si Rogelio, nag-shy away lang siya sa movie dahil na rin marahil sa kahihiyan sa pag-atras niya sa laban nung eleksyon.. Pero ginawa naman siyang Adviser for Rural Affairs ni President Marcos. Naalala ko pa na nabanggit ni Lola na noong panahon nina Rogelio at Carmen, ang usong kasuotan sa pelikula ay barong tagalog para sa kalalakihan at baro't-saya sa mga kababaihan. Oh! ha ang bongga naman nila dress kung dress ever.

Kung may intriga kay Rogelio, di naman pahuhuli si Carmen. Ayon kay Lolo iniwan ni Carmen ang asawang si Navales at anak na si Rene. At sumama kay Jose Puyat, isang milyonaryo na may pagawaan ng furnitures sa Pampanga. Nagkaroon siya ng isang anak kay Jose. At nang namatay si Jose ay kinuha niya ang anak niya kay Navales at inalagaan kasama si Cesar na anak niya kay Jose. Napamanahan siya ng shares of stock sa negosyo ng Puyat tulad ng Bowling Lanes, Manila Bank & Puyat Furnitures. Aba naisip ko tuloy close ba ang Grandpa ko kay Rogelio at Carmen? What do you think?

"Eto apo napapasin mo ba na madalas sa ilalim ng puno o dili kaya ay may payong ang eksena nila Rogelio at Carmen?" Si Lola talaga ano bang malay ko doon. Pero dahil nagtaka rin ako tinanong ko na rin kung bakit nga ba. "Aba'y akala ko hindi ka na interesadong malaman. Kapansin-pansin si Carmen na kahit nakasakay sa kalabaw ay nakabandana , sombrero at mahaba ang manggas ng damit. Ito ay dahil sa ingat na ingat siya sa malasutlang balat nya." Si Lola talaga syempre naman puhunan nila iyon. Wala naman yatang artista na hindi makinis ang balat eh. "Dahil may lahi sya, ¼ Filipina si Carmen. Dahil ang tatay nya ay isang Swiss."

Ang hirit naman ni Lolo. "At eto pa apo. Kung gusto mong kuminis at gumanda ang iyong balat ay gumamit ka rin ng Ponds Cold Cream, dahil iyan ang gamit ni Carmen sa kanyang balat." Aba naman pati ang brand ay alam ni Lola. "Ang pera nya ay napupunta sa properties, nag invest ng higit sa limang bahay kaya naman lumaki ang dalawa niyang anak sa isang marangya at malaking bahay."

Ang pagtatapos ni Lolo sa usapang Rogelio at Carmen. Ayon pa sa lolo at lola ko noong panahon na iyon ay walang kissing scene dahil "pag naghalikan mabubuntis daw ang artista." ang pabirong hirit ni Lola

Eddie Gutierrez & Susan Roces

"Oh, apo kilala mo naman siguro si Susan Roces at Eddie Gutierrez…" ang tanong ni Lolo na medyo amused. Di niya siguro akalain na magiging interesado ako sa nakaraan. "You stole the presidency not once but twice! Si Susan yan Grandpa." ang nangingiti kong sagot kay Lolo.

"Korek ka dyan, apo. Pero alam mo bang ang original na ka love-team ni Susan ay si Romeo Vasquez. Dangan nga lang at umalis si Romeo sa Sampaguita. Pero kahit ganon pa man, pumatok ang tambalang Eddie at Susan."

"Kasama rin ni Susan si Eddie sa sitcom na Tipitipitim-Tipitim, tapos bihira na lang siya gumawa ng movies. Pero hindi nangangahulugang nalaos siya. Dahil haggang ngayon ay mabangong-mabango pa rin ang pangalan nya. Kahit once in a blue moon siya gumawa at magpakita sa pelikula ay paniguradong paka-aabangan ng masa," sabi ni Lola na bakas sa mukha ang paghanga sa ilang henerasyong reyna ng pelikulang Pilipino.

Kung sa panahon nila Rogelio at Carmen ay nauso ang kanta sa movie, kay Susan at Eddie ay sayaw naman. Naalala ko tuloy ang isang palabas na ang corny ng sayaw ng mga artista doon. Tawa kami ng tawa ng kapatid ko. Napagalitan pa nga kami ni Mommy. Bakit daw namin tinatawanan eh yun ang uso noon.

Bilib daw si Lolo kay Susan dahil noong time na iyon ay uso na ang kissing scene sa movie, pero never daw na nagkaroon ng kissing scene si Susan. Bakit kaya? Hmmm..malay ko. Itanong nyo kaya sa kanya.

Sabi pa ng Grandpa ko, ang nausong kasuotan noong late 1960 ay ang magagarbong damit na parang mga gown. Ang lalaking artista ay naka-pomada at ang babae naman ay naka-teased ang buhok. Paulit-ulit lang naman ang uso mula sa mga kinagawiang damit at maging sa ayos.

Maraming taga-hanga si Susan Roces. Ilan dito ang kilala at bigating personalidad sa loob at labas ng showbiz. Sabi nga ni Mr. Bing Manalo "Up to now she's the brightest star of them all." Bago ko makalimutan. Nasabi nga pala ni lolo na si Mr Bing ay isang program analyst sa GMA network at loyal follower ni Susan. "Parang magandang name ng perfume yun ah, in her honor - Forever Susan" ang biro pa ni Mr. Manalo kay Lolo nang minsan mag-usap sila. Kung iisa-isahin ko ang magagandang bagay kay Susan ay sigurado akong hindi ito magkakasya dito. Pero ok lang alam ko naman na marami pa akong pagkakataon para maibahagi ito sa inyo.

Noong 1970 sa kainitan ng loveteam nina Nora Aunor at Tirso Cruz III (Guy & Pip), Vilma Santos at Edgar Mortiz ay natabunan ang tambalang Perla Adea & Romy Mallari. Kung tutuusin ay walang intriga ang kanilang loveteam ito ay dahil sa ayaw nila ng gimik. Si Perla ay isang magaling na singer sa radio kasabayan ni Eva Vivar. Classmate ng mommy ko noong elementary & Esperanza Fabon na naging lawyer at ngayon ay judge na sa Rizal Circuit Court. Nagkaroon sila ng business na trading of farm products sa Pampanga.

Naalala ko noon na nabanggit ni mommy na isa raw sa nagustuhan ni Perla kay Romy Mallari ay ang pagiging palabiro nito. Na kung tutuusin ay malayo sa character nya sa pelikula. Bakya daw ang tawag sa love team ni Perla at Romy, dahil bakya crowd ang nanonood sa kanila. Dahil siguro sa mga kanta nila at sa style ng sayaw, pati na ng kanilang kasuotan na pawang simple lamang. Kung tutuusin, ang loveteam nina Perla at Romy ay matatawag na successful dahil sila rin ang nagkatuluyan na hanggang ngayon ay mag-asawa pa rin at nabiyayaan pa ng maraming anak. Sabi pa ni mommy ay na mild-stroke daw si Romy ilang taon na ang nakakaraan pero naka-recover naman.

Nabitin ako dahil alam ko marami pang kwentong showbiz ang hindi pa ko pa nalalaman at alam ko sa mga susunod pang araw ay mag-kakaroon kami ng oras nila Lolo at Lola na pag-usapan ang nakaraan. Nakatutuwang pakingggan ang kwentong ilang dekada na ring itinago nila Lolo at Lola sa puso at alaala nila. Nang mga sandaling iyon para akong naglalakbay sa ilang taong nakalipas at nakilala ang mga taong nagbigay kila Lolo at Lola ng di matatawarang saya, luha at pag-asa. Alam ko na hindi papayag si Lolo na panoorin ang gusto ni Lola, kaya naman ako na ang nag-offer para samahan siya. Habang tinitigan ko sila nakikita ko ang sarili ko paglipas pa ng ilang taon. Gaya nila Lolo at Lola may kwento rin akong maipamamana sa aking apo.