Jan 13
MGA KOMIKS NOBELA BUBUHAYIN by webmaster  |  Posted in Articles  |  on Sat, Jan 13, 2007

Ni Pablo Libiran

Hindi maikakaila na ang mga nobela at mga istorya sa komiks ay nakaroon ng napakaraming tagahanga at mga tagasubaybay nuong dekada 70 hanggang 90. Katunayan, ang karamihan sa mga nobela sa komiks na isinapelikula ay talagang naging mga box office hit sa takilya at pinanuod ng napakaraming moviegoers. Kaya naman hindi masasabing ang mga istorya na nagmula sa mga babasahing ito ay mga bakya at walang literary value.

Kamakailan lamang, nang muling binigyang-buhay ang mga nobelang Kampanerang Kuba ng batikang nobelistang si Pablo S. Gomez at ang Darna na sinulat ni Mars Ravelo, ang mga istoryang ito ay muling kinagat ng publiko at nakakuha ng matataas na rating sa survey na isinagawa ng mga advertising company.

Maging ang mga pelikulang ginagawa nuon ng namayapang action king na si Fernando Poe Jr. ay pawang mula rin sa mga nobelang isinadula sa komiks. Karamihan sa mga iyon ay pawang isinulat ni Pablo S. Gomez at ng iba pang kilalang nobelista sa industriya ng komiks.

Ngayon, kung bagama’t iilan-ilan na lamang ang mga natitirang komiks na nalalathala, ang pananabik ng mga komiks aficionados ay maiibsan dahil sa pinakabagong proyektong ilulunsad ng Channel 2 sa telebisyon ay muli nilang bibigyang-buhay ang mga sumikat at hinangaang karakter at istorya sa komiks.

Ayon na rin sa pangulo ng Screenwriters’ Guild of the Philippines na si Pablo S. Gomez, hiningan na siya ng mga nobela ng mga namumuno sa Channel 2. Maging sina Elena M. Patron, Gilda Olvidado, Nerissa Cabral at Hal Santiago ay kinausap na rin nga mga ito upang makahingi ng permiso sa pagsasadula ng kanilang mga obra-maestra.

Bagama’t isang nobela sa isang serye lamang ang kanilang programa, maaaring ang pagsasadula ng bawa’t nobela ay madagdagan, batay na rin sa magiging pagtanggap ng mga televiewers.

“Magandang hakbang ito para mapanumbalik ang sigla ng ating mga writers,” ang masayang pahayag ni Mr. Gomez. “Dahil bukod sa muling masasaksihan ng madla ang mga karakter na binigyan-buhay ng mga nobelista, maaari ring magbukas ito ng bagong trend sa larangan ng pagsusulat.

“Ang nakakatuwa pa rin sa proyektong ito, magkakaruon ng assignment ang ating mga artista na unti-unti nang nawawala sa limelight at bumabago na ng mga hanapbuhay dahil sa paglamlam ng industriya ng pelikulang Pilipino. Hindi kasi maikakaila na ang mga napapanuod natin sa mga television series ngayon ay pawang mula sa mga ibang bansa.

“Masama ang nagiging epekto nito, maging sa ating kultura dahil ang kultura ng ibang bansa ang ating nagagaya at ito ang makakamulatan ng maraming kabataan na bagu-bgo pa lamang nanunuod ng telebisyon,” ang sabi pa niya.

Ayon na rin sa ulat na natanggap namin, dalawa na ang kinuha ng mga taga-ABS kay Mr. Gomez. Ang mga ito’y ang Inday Bote at Petrang Kabayo na pawang naisapelikula na at tumabo nang husto sa takilya. Pero sabi nga ng iba’y marami pa rin ang magkaka-interes na makapanuod nito dahil mababago ang presentation at ito’y gagampanan ng mga bagong artista sa telebisyon.

Ang mga nobelang The Hands, Betia, Sleeping Beauty, Elepanto at Jockey Tiyan at iba pa ay ilan lamang sa mga nobelang inaasahan na mapapanuod sa napakagandang proyektong ito ng mga namumuno sa Channel 2.

“Sa panahon ngayon na usung-uso na ang mga special effects ay magiging madali na ang pagpapalabas ng mga imposibleng eksena na makikita sa tunay na buhay. Maging ang mga elepante ay napapalipad na sa pelikula sa pamamagitan ng mga special effects,” ang sabi ni Mr. Gomez.

“Ang Inday Bote ay marami ring magagandang eksena na pantasya. Kung paanong ang isang mahirap na lagi na’y inaapi ay mabibigyan ng magandang buhay at kapalaran. Iyan ang gusto ng ating mga kababayan. Na kahit paano ay mangarap sila na mababago ang takbo ng kanilang buhay. Sa pamamagitan ng pantasya ay maaalis at matatakasan mila ang kanilang mga problema.

“Marami tayong mahuhusay na writer at maraming magagandang istorya na mula sa imahinasyon ng mga Pilipinong manunulat. Kailangan lamang na suportahan ito ng mga kompanya ng telebisyon. Kaya nakiki-usap ako na mas tulungan natin ang mga kapwa natin Pilipino kaysa mga dayuhang manunulat.

“Kung ikukumpara sa mga sinulat ng mga kababayan nating writers ang mga istorya ng mga tele-nobelang napapanuod natin mula sa ibang bansa, mas higit na magaganda pa ang ating istorya, kaya hindi tayo mahuhuli sa kanila,” ang sabi pa niya.

“Hintayin natin ang magandang proyektong ito ng Channel 2 at natitiyak ko na magiging big hit uli ito sa larangan ng telebisyon. At maaaring mangyari din na gayahin ito ng iba pang istasyon sa hinaharap. Kapag nangyari ito, matutuwa ang maraming writers at mga mambabasa ng komiks,” pagwawakas na pahayag ni Mr. Pablo S. Gomez.