May 28
ANG TELEVISION… NOON by Gabriel the Messenger  |  Posted in Articles  |  on Fri, May 28, 2010

1958 siya ipinanganak at ang natatandaan niya noong magka-isip siya ay apat lamang sa mga kilala niyang bata ang may television (TV) sa buong kapaligiran.

First ay sina Ate Baby na kapatid ni Rita. May TV sila pero lagi namang sarado ang pinto nila kaya bihirang makasilip si GTM sa TV nila. Parang Sta. Zita and Mary Rose yata ang lagi nilang pinapanood sa gabi. Drama yun.

Second ay doon sa kabila ng kalsada. Mayroon ring may TV doon. Kaya lang ay mahigpit ang mommy at daddy ng mga bata kaya hindi nakakanood doon si GTM pag nandoon ang parents ng mga bata.

May isa pa sa compound na may TV pero hindi na rin matandaan ni GTM ang pangalan nila. Sila ang third.

At si Mark na anak ni Mister Norona na isang dentista. Sila ang fourth.

Sa aming pagkakatanda, ang apat na ito na may TV ay parang mayroon ring telephone (PLDT—yan pa lang naman noon ang telepono). Status symbol po noong araw ang may TV at may telepono. Pag mayroon ka ng dalawang iyan, malamang sa malamang, mayroong kaya ang family mo. Kadalasan ay sinusundo at hatid ng school bus ang mga batang nag-aaral sa mga families na may TV at telepono noon.

Taong 1965 siguro iyon or earlier, ng lumipat sila GTM sa isang compound na maluwang sa may bandang 15th Avenue Murphy, Quezon City . Norona compound yata iyon. Isang dentista si Doctor Norona at ayon sa aming pagkakatanda, siya ay mayroong dugong Kastila.

Matangkad siya, maputi. At pag mayroong tinatanong (kinakausap) na tao, siya ay nakapamewang sabay salita ng katagang…”Por que?”

Dalawang lalaki ang anak niya, at hindi na namin matandaan ang pangalan ng panganay, pero sure kami na Mark ang pangalan ng pangalawa dahil siya ang kalaro ni GTM.

Addict sa TV si GTM. Monday to Friday ay inaabangan niya ang pag dating ni Mark from school para manood sila ng TV sa taas. At sa Sabado at Linggo naman, kung walang lakad ang family nina Mark ay sinusuwerte si GTM sa maghapong panonood ng TV kila Mark.

During those times, ang palabas ay Popeye with sweetheart Olive Oyl, si kontrabidang Brutus and a can of Spinach. Iyan ang pinakasikat na palabas na natatandaan ni GTM. Kung minsan ay mayroon ring iba na tulad ng Betty Boop, Heckle and Jeckle (dalawang ibon na kulay itim…magpies daw) at iba pa.

Pagkatapos ng cartoons ay sisingit naman ang Flash Gordon. Isa itong series kaya talagang Monday to Friday ay gumagawa ng paraan si GTM para mapanood niya ito. Pag wala si Mark, pipilitin niyang humanap ng bukas na TV sa paligid at titignan kung Flash Gordon ang palabas.

After that, ito naman ay susundan ng mga super heroes na cartoons. Captain America, Mighty Thor, Submariner, Iron Man at iba pa. At pagkatapos noon, uuwi na si GTM sa bahay. Balita na yata o drama ang kasunod. At saka gabi na rin yun.

pic-old-tv.jpg

Pero somewhere sa taong 1963, gabi noon, halos lahat ng TV ay bukas. Balita ang pinanonood ng mga tao. Namatay o binaril daw ang presidente ng Amerika. Ngayon ay alam na natin na siya ay si John F. Kennedy. Big news nga naman.

Ang isang kaibigan naming bata na si Jess na nagtitinda ng dyaryo ay kasing taas daw niya ang tumpok ng dyaryong naibenta niya sa mag-hapon. Halos tumulo ang kanyang laway habang nagkukwento.

Taong 1968 ng lumipat sila GTM sa likuran ng Camp Crame, San Juan. Mas lalong mahirap dito sa lugar na ito ang TV. Grade five na noon si GTM. Sa buong Barrio ay ta-tatlo lang yata ang may TV na pwedeng manood ang may gusto. Doon kina Baclig, kina Rapista, at sa pinsan nilang sina Dalingay. Ok na sana dahil pinsan, kaya lang, medyo malayo naman sila sa bahay nila GTM.

Grabe sa gabi. Punong-puno ang mga bahay na nagpapapasok ng tao para manood ng TV. Isang tambak ang tsinelas sa labas. Halos isang sako. Kaya feel na siguro ninyo ang sari-saring smell ng tao. At pag oras na ng uwian, naku po, kanya-kanya ng hanapan ng tsinelas.

Then one day, may narinig na balita si GTM. Bibili daw ng TV ang tatay niyang si Pablo dahil sa nalalapit na pag landing ng Apollo 11 sa buwan. 1969 yun. Tuwang-tuwa naman ang addict sa TV na si GTM.

Noong araw, pag gusto mong magkaroon ng TV, o-order ka muna. At pagkatapos, after sometime (siguro two weeks?) ay mag de-deliver sila ng trial unit sa inyong bahay. Hindi pa iyon ang inorder mo. Aantayin mo pa iyon. In the meantime, manood ka muna sa isang trial unit na TV. At saka iba pa ang korte ng mga TV noon, parang cabinet na parihaba. Kasya ang isang tao sa loob kung aalisin ang TV.

Sa sobrang tagal ng pagdating ng TV nila GTM, mukhang nakalanding na yata sa moon sila Neil Armstrong bago napalitan ang trial unit na TV ng tunay na unit para sa kanila.

Ganyan ang TV noon.


Your FEEDBACK can be posted at www.filmacademyphil.org/forum/